Mary Magdalene

Mary Magdalene (Türkiyədə Magdalalı Meryem adı ilə də tanınır), Garth Davisin rejissorluğu ilə çəkilmiş 2018-ci il tarixli İncil mövzulu bioqrafik dramdır. İngilis dilində çəkilən film ABŞ, Birləşmiş Krallıq və Avstraliya birgə istehsalıdır; təxminən iki saat davam edir. Film4 Productions və FilmNation Entertainmentin üstləndiyi layihə Məryəmin hekayəsini Müqəddəs Kitaba və apokrif mətnlərə əsaslanan feminist baxışla yenidən işləyir. Dünya premyerası 2018-ci il fevralın 26-da Londonun National Gallery qalereyasında keçirilmiş; Birləşmiş Krallıqda martın 16-da, Avstraliyada 2018-ci il martın 22-də, ABŞ-da isə yalnız 2019-cu il aprelin 12-də ekrana çıxmışdır.

Birinci əsrin müqəddəs torpaqlarında keçən hekayə kiçik bir balıqçı qəsəbəsində ənənəvi ailə ilə yaşayan gənc qadın Məryəmin ətrafının diktə etdiyi sərhədlərdən çıxıb yeni həyat axtarmasını danışır. Xarizmatik lider kimi ortaya çıxan İsanın hərəkatına qatılır və təlimini izləyərək Qüdsə gedir; beləliklə, Xristianlığın doğuşunun tən ortasında özünü tapır. Məryəmi Rooney Mara, İsanı Joaquin Phoenix, Petrusu Chiwetel Ejiofor, Yəhudanı isə Tahar Rahim oynayır. Ansamblda Lubna Azabal, Hadas Yaron, Shira Haas, Ryan Corr və Uri Gavriel kimi adlar da var.

Ssenarini Helen Edmundson ilə Philippa Goslett yazmışdır. Film musiqisi İslandiyalı bəstəkar Jóhann Jóhannssonun ölümündən əvvəl tamamladığı son film musiqisidir; Hildur Guðnadóttir ilə birlikdə hazırlanmışdır.