Serhat Hacıpaşalıoğlu

Serhat Hacıpaşalıoğlu — Biografia

Ahmet Serhat Hacıpaşalıoğlu (l. 24 tetor 1964, Stamboll) ose, siç njihet, Serhat, është këngëtar, producent dhe prezantues turk.

Serhat, që lindi dhe u rrit në Stamboll, filloi produksionin në vitin 1994 duke themeluar kompaninë me emrin End Productions. Të njëjtin vit filloi të bënte produksionin dhe prezantimin e Riziko!, përshtatja turke e kuizit amerikan Jeopardy!, që transmetohej në TRT. Në vitin 1997 botoi singlin e tij të parë me titull "Rüya-Ben Bir Daha". Përveç punëve të tjera të prezantimit dhe produksionit, vazhdoi edhe karrierën muzikore dhe u publikuan "Total Disguise" (duet me Viktor Lazlo) në vitin 2004, "Chocolate Flavour" në 2005, "I Was So Lonely", "No No Never (Moscow-Istanbul)" dhe "Ya + Ti" (versioni rusisht i "Total Disguise", të tria duete me Tamara Gverdtsiteli) në 2008, dhe "Je M'Adore" në 2014.

Serhat përfaqësoi San Marinon me këngën me titull "I Didn't Know" në Konkursin e Këngës Eurovision 2016, që u zhvillua në Stokholm. Duke u eliminuar në gjysmëfinalen e 10 majit, nuk arriti të fitonte të drejtën për të garuar në finale. Në vitin 2017 u publikua versioni disko i këngës, ku bëri duet me Martha Wash. Ky version u ngjit deri në vendin e 25-të në listën Dance Club Songs në Shtetet e Bashkuara të Amerikës, ndërsa Serhat u bë këngëtari i parë turk që hyri në këtë listë. Në vitin 2018 u publikua një version i ri i "Total Disguise", ku Serhat bëri duet me Elena Paparizu. Më 3 maj 2019 u publikua albumi i tij i parë studioik That's How I Feel. Në Konkursin e Këngës Eurovision 2019, që u zhvillua në Tel Aviv, përfaqësoi për herë të dytë San Marinon me këngën me titull "Say Na Na Na" dhe arriti renditjen më të mirë të vendit në historinë e Konkursit të Këngës Eurovision. Në vitin 2019 u publikua versioni gjermanisht i këngës, "Sing Na Na Na", dhe në 2020 versioni spanjisht, "Di Na Na Na". Në vitin 2022 publikoi një aranzhim të "Benim Halkım", të interpretuar fillimisht në vitin 1975 nga Tanju Okan.