Izabela (Isabel) (përkthyer)

Isabel është një serial historik spanjoll i drejtuar nga Jordi Frades dhe i përgatitur nga Diagonal TV për Televisión Española. Seriali, që rrëfen jetën e Izabelës I të Kastiljes, sundimtares që njihet si Izabela Katolike, u transmetua në La 1 nga 10 shtatori 2012 deri më 1 dhjetor 2014 në tri sezone dhe gjithsej 39 episode. Prodhimi, i xhiruar me një buxhet prej rreth 726.000 eurosh për episod, tërhoqi interesin e shumë kanaleve nga Evropa dhe Amerika. Transmetimi u shty për rreth tetë muaj nga data e planifikuar fillimisht, janari 2012, për shkak të shkurtimeve në buxhetin e RTVE-së.

Izabelën e luan Michelle Jenner, Ferdinandin e Aragonës Rodolfo Sancho; në kast janë edhe Pablo Derqui, Bárbara Lennie dhe Ginés García Millán. Sezoni i parë (13 episode) shtrihet nga lindja e mbretëreshës te luftërat civile për fronin e Kastiljes dhe martesa e saj me Ferdinandin, pastaj kurorëzimi. Sezoni i dytë trajton vitet 1474-1492: Luftën e Trashëgimisë së Kastiljes, krijimin e Inkuizicionit, dëbimin e hebrenjve, pushtimin e Granadës dhe fillimin e ekspeditave të zbulimit të Kolombit. Sezoni i fundit arrin te vdekja e mbretëreshës në vitin 1504 me martesat dhe humbjet e fëmijëve të saj.

Xhirimet u bënë në Madrid, Segovia dhe Sevilje, si dhe në Pallatin e Alhambrës në Granada. Historia vazhdon me filmin televiziv La corona partida, që rrëfen periudhën pas vdekjes së mbretëreshës; në film Rodolfo Sancho luan Ferdinandin, ndërsa Irene Escolar Joanën e Çmendur.