Mustang

Mustang është një film dramë dhe rritjeje i vitit 2015, prova e parë e regjisë me metrazh të gjatë e Deniz Gamze Ergüvenit. Filmi, me skenar të shkruar nga Ergüveni bashkë me Alice Winocour, është bashkëprodhim i Francës, Gjermanisë, Turqisë dhe Katarit dhe u xhirua në turqisht. Historia rrëfen se si pesë motra jetime, që jetojnë në İnebolu me gjyshen dhe xhaxhallarët e tyre, mbyllen në shtëpi pasi një lojë e pafajshme me shokët kthehet në skandal dhe si përpiqen t'i martojnë ato një nga një. Në rrëfimin që jepet përmes syve të motrës më të vogël, Lales, motrat kërkojnë lirinë e tyre përballë shtypjes.

Filmi pati premierën botërore në seksionin Pesëmbëdhjetë Ditët e Regjisorëve të Festivalit të Filmit të Kanës 2015 dhe fitoi çmimin Europa Cinemas Label. Ai mori në emër të Francës nominimin për Filmin më të Mirë në Gjuhë të Huaj në Çmimet e 88-ta të Akademisë; në Çmimet César fitoi katër çmime, përfshirë ato për Filmin e Parë më të Mirë dhe Skenarin Origjinal më të Mirë. Gjithashtu fitoi Çmimin Lux të Parlamentit Evropian.