Të gjithë e dinë (Todos lo saben) (përkthyer)

Thrilleri psikologjik në spanjisht Todos lo saben (Everybody Knows, në Turqi Herkes Biliyor), skenarin e të cilit e shkroi dhe e drejtoi regjisori iranian Asghar Farhadi, është prodhim i vitit 2018. Filmi, bashkëprodhim i Spanjës, Francës dhe Italisë, është puna e parë e Farhadi-t në spanjisht. U shfaq më 8 maj 2018 si film hapës i Festivalit të 71-të të Filmit në Kanë dhe garoi për Palmën e Artë.

Laura jeton në Buenos Aires me bashkëshortin dhe fëmijët. Kthehet në fshatin spanjoll ku lindi dhe u rrit, për dasmën e motrës; familja dhe të njohurit e vjetër janë mbledhur sërish. Në mes të festës vajza e madhe e Laurës rrëmbehet dhe askush nuk e di se kush e ka bërë. Ndërsa kërkimi vazhdon, rritet tensioni mes të afërmve dhe fshatarëve, dalin në sipërfaqe sekrete që kishin mbetur të fshehura në të shkuarën. Si në shumë filma të Farhadi-t, vihen në pyetje lidhjet familjare dhe zgjedhjet morale. Rolet kryesore i ndajnë Penélope Cruz, Javier Bardem dhe Ricardo Darín; në ekip janë edhe Eduard Fernández, Inma Cuesta dhe Bárbara Lennie.

Xhirimet nisën më 21 gusht 2017 në Spanjë dhe përfunduan në dhjetor; shumica e skenave janë xhiruar në Torrelaguna të Komunitetit Autonom të Madridit. Producentë janë Memento dhe Morena. Filmi doli në kinema në Spanjë më 14 shtator 2018, në Turqi më 8 mars 2019 dhe mori vlerësime pozitive nga kritikët.