Qılınc Əməliyyatı (Sablja) (tərcümə)

Operation Sabre (serbcə orijinal adı ilə Sablja), 2024-cü il istehsalı olan, tək mövsümlük, səkkiz bölümlük Serb siyasi dram və tarixi cinayət mini-serialıdır. 2003-cü ildə Belqradda Baş nazir Zoran Đinđićin sui-qəsdə məruz qalmasından sonra ölkənin düşdüyü qarışıqlığı və eyniadlı polis əməliyyatını nəql edir. Serbiya, Almaniya və Bolqarıstanın birgə istehsalı olan serialın bölümləri 44 ilə 65 dəqiqə arasında davam edir.

Povest bir jurnalistin, bir polisin və bir cinayətkarın gözü ilə irəliləyir; çoxsaylı geriyə qayıdışlar Serbiyanın 2000-2003-cü illər arasındakı siyasi dövrünü və Zemun klanı ilə Xüsusi Əməliyyatlar Bölməsinin hadisədəki payını araşdıran istintaqı işıqlandırır. Aktyorlar arasında Dragan Mićanović, Izudin Bajrović, Sergej Trifunović, Jasna Đuričić, Ljubomir Bandović, Milica Gojković, Tihana Lazović, Marko Grabež və Marko Marković yer alır.

Goran Stanković ilə Vladimir Tagić serialın rejissorlarıdır; ssenarini Maja Pelević ilə birlikdə yazmışlar. Üçlük daha əvvəl RTS-in Jutro će promeniti sve serialında da çalışmışdı. 24 fevral 2024 üçün nəzərdə tutulan nümayiş serialın festivallara qatıla bilməsi üçün təxirə salındı. İlk iki bölüm Canneseries festivalında tamaşaçı ilə görüşdü və aktyor heyətinin hamısı kollektiv aktyorluq mükafatı qazandı; regional premyera 30-cu Sarayevo Kinofestivalında keçirildi. Serial 2-24 noyabr 2024-də RTS 1-də yayımlandı.