Attila

Attila (emri origjinal italisht Attila, il flagello di Dio, në frëngjisht Attila fléau de Dieu), që konsiderohet nga shembujt e hershëm të zhanrit të shpatës dhe sandaleve, është një dramë historike që ka për temë jetën e sundimtarit hun Attila dhe u xhirua në vitin 1954 si bashkëprodhim Itali-Francë. Filmin që Dino De Laurentiis dhe Carlo Ponti e prodhuan për Lux Film e drejtoi Pietro Francisci.

Në rolin e Attilës është Anthony Quinn. Sophia Loren luan Honorian; ylli francez Henri Vidal është komandanti romak Flavius Aetius përballë mbretit hun. Irene Papas, në filmin e dytë të tri kontratave që ka bërë me Lux Film, luan Grunen, një nga gratë e Attilës. Në kastin mbështetës, që në shumicë përbëhet nga aktorë francezë dhe italianë, janë emra si Ettore Manni, Christian Marquand, Claude Laydu dhe Guido Celano; aktori amerikan Scott Marlowe me këtë film hodhi hapin e parë në kinema.

Filmi u xhirua menjëherë pas bashkëprodhimit italo-amerikan Ulisse (1954) të po të njëjtit ekip. Qëllimi i producentëve ishte të punonin me një yll kryesor amerikan dhe ta licensonin filmin për shpërndarje me kushte më fitimprurëse te një studio amerikane; për shumë arsye të paparashikuara kjo në fillim nuk ndodhi. Kur tri vjet e gjysmë më vonë u shfaq sërish me emrin Attila, u bë filmi që e nisi karrierën e Joseph E. Levine si producent dhe shpërndarës filmash ndërkombëtarë dhe u konsiderua një nga sukseset më të mëdha të Lorenit në arka në vitet 1950.