Rruga e Drejtë (Hak Yolu) (përkthyer)

Hak Yolu është një film dramë bardhezi, bashkëprodhim turko-iranian, i dalë në ekrane në vitin 1971. Prodhimi, të cilin e ka regjizuar Mahmoud Koushan, është xhiruar në studiot Erler Film dhe Pars Film; skenari mban firmën e Erdoğan Tünaşit dhe İsmail Kuşanit, ndërsa muzika atë të İsmet Nedimit. Filmi mban gjurmët e traditës Filmfarsi të asaj periudhe.

Historia zhvillohet rreth Aliut, inxhinier në një fabrikë. Cihangiri, kushëriri i Aliut, jo vetëm që vjedh para nga fabrika, por edhe ia hedh fajin kushëririt, dhe Aliu bie në burg. Pasi shpallet i pafajshëm dhe lirohet, Aliu me kalimin e kohës ngrihet në pozitën e kryeinxhinierit të fabrikës dhe atje njihet me Meltemin, që punon si sekretare, dhe të dy dashurohen. Por Allahverdi, djali i vogël i Aytenit, motrës së Meltemit, i lindur nga Cihangiri që e ka braktisur dhe të cilin të gjithë e fshehin, bëhet sprova më e madhe e dashurisë së dy të rinjve. Çifti, i shtyrë drejt ndarjes nga shpifjet e Cihangirit, mund të bashkohet përsëri vetëm pas një sherri të madh gjatë natës së dasmës, kur del në dritë e vërteta. Cüneyt Arkın mishëron Aliun, Cihangir Gaffari mishëron Cihangirin e ligë; në kast marrin pjesë edhe Niloofar, Hamideh Kheirabadi dhe Morteza Ahmadi.