Komedi Romantike (Romantik Komedi) (përkthyer)

Romantik Komedi është një komedi romantike turke e drejtuar nga Ketche dhe e prodhuar nga Boyut Film. Filmi 113-minutësh doli në kinematë në të gjithë Turqinë më 5 shkurt 2010 dhe hyri ndër filmat turq me arkëtimet më të larta të vitit 2010. Filmi, që emrin e ka marrë nga zhanri, thekson vendin e dashurisë dhe të miqësisë në jetë dhe e shikon me sy të gëzuar marrëdhënien mes burrave dhe grave. Skenarin e kanë shkruar Ceren Aslan dhe Aslı Zengin.

Në qendër të historisë janë tri gra të forta që jetojnë në metropol dhe janë shumë të afërta me njëra-tjetrën: Esra, Didem dhe Zeynep. Zeynep është gati të martohet dhe dasma e saj është plot surpriza. Esra, që prej vitesh punon në një punë që nuk e dëshiron, jep dorëheqjen, i jep fund marrëdhënies që po shkonte keq dhe fillon punë në një agjenci reklamash. Ndërsa i afrohet Mertit, drejtorit kreativ të agjencisë, Didem tërhiqet nga aktori Cem Sezgin, shoku i Mertit. Vendimet e tri shoqeve do t'ua ndryshojnë jetën. Në role janë Sedef Avcı, Sinem Kobal, Cemal Hünal, Engin Altan Düzyatan, Begüm Kütük, Kaan Çakır dhe Kubilay Penbeklioğlu, së bashku me Janset, që luan personazhin Suzan.

Shoqëria prodhuese Boyut Film kishte bërë zhurmë më parë në arka me filmat e drejtuar nga Mahsun Kırmızıgül; këtë herë ka kapur zhanrin e komedisë romantike, për të cilin në Turqi prej kohësh nuk ishin dhënë shembuj të suksesshëm. Një kritikë ka shkruar se producentët janë mbështetur te formula amerikane dhe e kanë marrë si shembull serialin Sex and the City.