Marko Polo (Marco Polo) (tərcümə)

On üçüncü əsrin məşhur venesiyalı taciri və kəşfiyyatçısının Şərqə səyahətini danışan Marco Polo 1982-ci ildə hazırlanmış amerikan-italyan televiziya mini serialıdır. Rejissor kreslosunda Giuliano Montaldo oturur; baş rolda Ken Marshall yer alır. Layihə Amerika Birləşmiş Ştatlarında NBC, İtaliyada RAI şəbəkəsində ilk dəfə göstərildi, ardınca cəmi 46 ölkəyə çatdı. Qərbli bir yayımçı ilə bir Çin televiziya qurumunun bu növdə ilk birgə işi olması da serialın özəl cəhətlərindən biridir.

Hekayə gənc Marconun atası və əmisi ilə birlikdə Çinə doğru yola çıxması ilə başlayır. Asiyanı aşmaq üç il yarım çəkir; yol bəzən quru səhralardan, bəzən sonsuz çöllərdən keçir. Pekinə çatan Marco illərlə Böyük Xanın qonağı kimi orada qalır və imperatorun etibarını və hörmətini qazanır. Heyətdə Denholm Elliott, Anne Bancroft, John Gielgud, Burt Lancaster, Ian McShane, Leonard Nimoy və F. Murray Abraham kimi adlar da var. Ssenarini David Butler ilə Vincenzo Labella yazdı.

Serial ABŞ-da 16-19 may 1982-ci il arasında göstərildi; İtaliyada Rai 1-də 1982-ci il dekabrın 5-dən 1983-cü il yanvarın 23-dək yayımlandı. İlk yayımda dörd bölüm kimi təqdim olundu; birinci və dördüncü bölümlər ikinci və üçüncüdən iki dəfə uzun idi. Zaman-zaman altı bərabər bölüm halında da göstərildi.