Pul və qandan (D'argent et de sang) (tərcümə)

Of Money and Blood (fransızca orijinal adı D'argent et de sang) Canal+ üçün hazırlanmış Fransa cinayət dramı və triller mini serialıdır. Xavier Giannoli serialın yaradıcısı və rejissorudur; ssenarini Antoine Lacomblez ilə birlikdə yazmış, rejissorluğu isə Frédéric Planchon ilə bölüşmüşdür. Layihə Curiosa Films imzasını daşıyır. Dünya premyerasını 31 avqust 2023-cü ildə Venesiya Film Festivalında müsabiqədənkənar nümayişlə edən serial 16 oktyabr 2023-cü ildən 19 fevral 2024-cü ilə qədər Canal+ kanalında yayımlandı.

Mövzu 2008-2009-cu illərdə Fransada və Avropada baş verən karbon kvotası ƏDV fırıldağıdır; təhkiyə bu hadisəyə “əsrin fırıldağı” gözü ilə baxır. Qlobal istiləşmə ilə mübarizə üçün təzə qurulan karbon kvotası bazarında milyardlarla avro buxarlanıb getmişdir. Serial Bellevilledən çıxmış bir fırıldaqçı dəstəsi ilə varlı məhəllələrdən gələn bir birja makleri arasındakı ortaqlığı danışır; ikilinin ardınca vəsvəsəli bir müfəttiş düşür və hadisə böyüdükcə mənafeyin kənarında insani ehtiraslar da işə qarışır.

Rollarda Vincent Lindon, Niels Schneider və Ramzy Bedianın yanı sıra Judith Chemla, David Ayala, Olga Kurylenko, Yvan Attal, André Marcon, Victoire Du Bois, Matthias Jacquin və Lyes Kaouh yer alır. Serial Mediapart jurnalisti Fabrice Arfinin eyniadlı 2018-ci il tarixli kitabından uyğunlaşdırılmışdır.