Uliss (Ulisse) (tərcümə)

Ulisse (Ulysses), Homerin Odysseia dastanından uyğunlaşdırılan 1954-cü il tarixli fantastik macəra filmi və "peplum" janrının nümunələrindən biridir. Mario Camerininin çəkdiyi film İtaliya, Fransa və Amerika Birləşmiş Ştatlarının birgə istehsalıdır; prodüserləri Dino De Laurentiis və Carlo Pontidir, istehsal şirkəti Lux Filmdir. Ssenarini Camerini ilə Franco Brusati yazdı; yeddi nəfərlik müəllif heyətində Ben Hecht və Irwin Shaw da vardı. İtaliyada 6 oktyabr 1954-cü ildə nümayişə çıxdı, ABŞ-da isə bir il sonra Paramount Pictures tərəfindən yayıldığı üçün tez-tez 1955-ci il istehsalı kimi də xatırlanır.

Kirk Douglas İtaka kralı Odisseyi oynayır. Silvana Mangano ikili rol üstlənir: Odisseyin sadiq həyat yoldaşı Penelopa və cadugər Kirka. Anthony Quinn Penelopaya elçi düşənlərin başında duran Antinoyu, Rossana Podestà isə Navsikaanı canlandırır. Film dastanın əsas xəttinə nisbətən sadiq qalır; təxminən yüz dəqiqəyə sığışdırmaq üçün hadisələr qısaldılmış, bəziləri çıxarılmış və ya yenidən sıralanmışdır.

Rejissorluq üçün ilk seçim Georg Wilhelm Pabst idi, lakin o yalnız hazırlıq mərhələsində iştirak edib son anda çəkildi və iş Camerinidə qaldı. Quruluşçu operator Mario Bava Polifem səhnələrinin çəkilişinə töhfə verdi. Texnikolor görüntülər Harold Hal Rossona aiddir və tənqidçi John Eames filmi dövrün İtaliya eposlarının orta səviyyəsindən yuxarı tapmışdır. Film İtaliyada 1954-1955 mövsümünün ən çox izlənən işi oldu.