300 Fjalë Gjermanisht (300 Worte Deutsch) (përkthyer)

300 Worte Deutsch («300 fjalë gjermanisht») është një film komedi gjerman që luan me veçoritë kulturore dhe stereotipet për turqit që jetojnë në Gjermani. E ka shkruar dhe e ka drejtuar Züli Aladağ; në skenar e kanë shoqëruar Ali Samadi Ahadi dhe Gabriela Sperl. Filmi, që lëkundet mes komedisë dhe dramës dhe ku dëgjohen gjermanishtja, turqishtja dhe gjermanishtja zvicerane, zgjat 96 minuta. Shfaqja e parë e filmit u bë më 29 qershor 2013 në Filmfest München; në Gjermani doli në kinema më 5 shkurt 2015 dhe nga 28 gushti 2015 u vu në shitje edhe në DVD dhe Blu-ray.

Historia zhvillohet në Këln. Një udhëheqës komuniteti që dëshiron t'u gjejë nuse beqarëve të komunitetit të tij, sjell gra të reja nga Turqia në Gjermani. Kur del se gratë nuk dinë fare gjermanisht dhe dokumentet e gjuhës janë false, ndërhyn zyra e migracionit dhe lind rreziku i dëbimit. Filmi e trajton me humor fërkimin mes jetës tradicionale dhe jetës moderne. Në ansambël janë Sermiyan Midyat, Vedat Erincin, Aykut Kayacık, Almila Bağrıaçık, Nursel Köse, Navíd Akhavan, Kida Khodr Ramadan dhe Özay Fecht; Pelin Öztekin e luan Nuranin. Nadja Uhl, Christoph Maria Herbst, Pegah Ferydoni, Christoph Letkowski, Arzu Bazman dhe Erdal Yıldız janë gjithashtu në listën e aktorëve.