Quo Vadis, Aida?

Quo Vadis, Aida? (latinisht "Ku po shkon, Aida?") është një dramë lufte e vitit 2020, e shkruar dhe e drejtuar nga Jasmila Žbanić, e cila e ka prodhuar edhe vetë. Filmi bazohet te libri i Hasan Nuhanović-it Under the UN Flag. Është një bashkëprodhim ndërkombëtar me pjesëmarrjen e dymbëdhjetë shtëpive prodhuese; kanë marrë pjesë kompani nga tetë vende, kryesisht nga Bosnjë-Hercegovina, Gjermania dhe Franca. Premierën botërore e pati në seksionin kryesor konkurrues të Festivalit të 77-të të Filmit të Venecias dhe u nominua në Çmimet e 93-ta të Akademisë në kategorinë e Filmit më të Mirë Ndërkombëtar.

Subjekti është masakra e Srebrenicës e korrikut 1995: Ushtria Serbe e Bosnjës nën komandën e gjeneralit Ratko Mladić vrau më shumë se 8.300 burra e djem boshnjakë. Ngjarjet rrëfehen përmes syve të Aida Selmanagić-it, që punon si përkthyese për Kombet e Bashkuara. Aida përpiqet nga njëra anë të kryejë detyrat e punës, nga ana tjetër t'i shpëtojë burrin dhe dy djemtë nga vdekja e sigurt. Aidën e luan Jasna Đuričić. Burrin, Nihadin, e luan Izudin Bajrović, Mladićin Boris Isaković; në kast janë edhe Johan Heldenbergh dhe Emir Hadžihafizbegović.

Filmi ka fituar çmimin e publikut në Festivalin Ndërkombëtar të Filmit të Roterdamit, çmimin për filmin më të mirë të huaj të vitit 2021 në Festivalin e Filmit të Gëteborgut; në Çmimet e Filmit Evropian ka marrë çmime në kategoritë e Filmit më të Mirë, Regjisorit më të Mirë dhe Aktores më të Mirë. Ka edhe dy nominime për BAFTA. Vazhdimi i shpallur nga Žbanić, The Missing Part, pritet në vitin 2027.