Kosmos

Kosmos — Reha Erdemin ssenarisini yazıb rejissorluq etdiyi, Atlantik Film istehsalı olan Türkiyə-Bolqarıstan birgə dram filmidir. Karsda çəkilən film, qarlar altındakı zamandan kənar bir sərhəd qəsəbəsinə ağlaya-ağlaya gələn Kosmos adlı qəribə bir səyyahın hekayəsini danışır. Çayda boğulmaqda olan uşağı həyata qaytardığı üçün qəsəbə sakinləri tərəfindən möcüzə yaradan biri kimi qəbul edilən Kosmos, heç yatmayan, şəkərlə qidalanan və ağacların nazik budaqlarında quş kimi otura bilən qeyri-adi bir personajdır.

Sevgi axtarışında olduğunu açıq şəkildə dilə gətirən Kosmosla xilas etdiyi uşağın böyük bacısı Neptün arasında qəribə bir yaxınlaşma yaranır. Şəfa axtaranlar onun ətrafına toplaşarkən, qəsəbədə baş verən dükan soyğunları və bir sıra bədbəxt hadisə hamının ondan uzaqlaşmasına səbəb olur. 122 dəqiqəlik filmdə Kosmos rolunu Sermet Yeşil, Neptün rolunu Türkü Turan canlandırır; heyətdə Serkan Keskin, Saygın Soysal və Nadir Sarıbacak da yer alır. Film Türkiyədə 16 aprel 2010-cu ildə ekranlara çıxdı.