Beteja e Trimëve (Nouvelle-France) (përkthyer)

Battle of the Brave, me titullin origjinal Nouvelle-France (“Franca e Re”), është një dramë romantike historike e vitit 2004. Filmi, bashkëprodhim i Francës, Mbretërisë së Bashkuar dhe Kanadasë, përmendet si prodhimi më i kushtueshëm i xhiruar deri atëherë në Québec; ka kushtuar rreth 30 milionë dollarë kanadezë. Versionet në anglisht dhe frëngjisht janë xhiruar njëkohësisht. Në karrigen e regjisorit është Jean Beaudin, që ka drejtuar shembuj të dashur të kinemasë së Québec-ut si Le Matou; skenari i përket Pierre Billon-it dhe Gilles Carle-s. Në Turqi u shfaq me titullin Umutlar Ülkesi në nëntor 2006.

Rrëfimi zhvillohet në shekullin e 18-të në Québec, në vitet e para të pushtimit ushtarak britanik, dhe frymëzohet shumë lirshëm nga ngjarja e “la Corriveau” e vitit 1763. Le Gardeur është një i ri që e lë rendin borgjez dhe jeton në pyll me vendasit; kur mëson se babai i tij është i sëmurë, kthehet për të marrë lamtumirën, por nuk arrin ta gjejë. Në qytet njihet me shëruesen Marie-Loup dhe bie në dashuri me të. Por kritikat e pandërprera të Atit Blondeau ndaj gruas së re, që në fakt burojnë nga ndjenjat që ai ushqen për të, e vënë në rrezik jetën e çiftit.

Në krye të pjesës së aktorëve janë Noémie Godin-Vigneau, David La Haye, Juliette Gosselin dhe Sébastien Huberdeau. Tërheqjen ndërkombëtare e ofrojnë Gérard Depardieu, Irène Jacob, Vincent Pérez, Tim Roth, Jason Isaacs dhe Colm Meaney.