Spiuni (The Spy) (përkthyer)

The Spy (në turqisht Casus) është një miniserial spiunazhi francez i xhiruar në anglisht, që bazohet në jetën e Eli Cohenit, një nga spiunët më të njohur të Mossadit izraelit. Serialin, të krijuar dhe të regjisuar nga Gideon Raff, e ka prodhuar kompania franceze Légende për Canal+ dhe Netflix; në Francë e transmetoi OCS, në vendet e tjera Netflix. Seriali me gjashtë episode filloi në Netflix më 6 shtator 2019 dhe, sipas Metacritic, mori vlerësime "përgjithësisht pozitive".

Historia ndjek Cohenin, që në fillim të viteve '60 jetonte në Damask me identitet të rremë. Cohen depërton në rrethet e larta të Sirisë, ngrihet deri në shkallët e epërme të politikës; në fund zbulohet nga administrata siriane, dënohet me vdekje dhe në vitin 1965 varet publikisht në një shesh në Damask. Cohenin, që në Izrael konsiderohet hero kombëtar, e luan Sacha Baron Cohen (mes tyre nuk ka lidhje farefisnore); Noah Emmerich është aktori kryesor mbështetës. Në kast bën pjesë edhe Tim Seyfi.

Seriali frymëzohet nga libri L'espion qui venait d'Israël i Uri Danit dhe Yeshayahu Ben Poratit; skenari i përket Raffit dhe Max Perry. Xhirimet u bënë kryesisht në Kazablankë. Interpretimi i Baron Cohenit u vlerësua dhe ai u nominua në Çmimet e 77-ta Globi i Artë në kategorinë Aktori më i mirë në një miniserial ose film televiziv. Seriali u kritikua për shmangie nga saktësia historike; për shembull, nuk ka verifikim të pavarur se me cilët emra e takonte Cohen elitën siriane.