Cirkus Columbia

Cirkus Columbia, bosniyalı rejissor Danis Tanovićin 2010-cu ildə çəkdiyi, Bosniya və Herseqovina ilə Fransanın birgə istehsalı olan dram-komediya filmidir. Türkiyədə Güzel Bir Hayat Düşlerken adı ilə 7 yanvar 2011-ci ildə nümayişə çıxmışdır. Film xorvat mənşəli bosniyalı yazıçı Ivica Đikićin eyni adlı romanından uyğunlaşdırılmışdır; ssenarini Tanović Đikićlə birlikdə yazmışdır. Torontoda ilk dəfə tamaşaçı ilə görüşən layihə 67-ci Venesiya Film Festivalında və 2011-ci il Trieste Film Festivalının açılışında nümayiş olunmuş, Saraybosna Film Festivalında tamaşaçı mükafatını almış, 2010-cu il Antalya Qızıl Portağal Film Festivalında Ən Yaxşı Film seçilmişdir. Bosniya və Herseqovinanın Oskar xarici dildə ən yaxşı film namizədi olmuş, lakin final siyahısına düşməmişdir.

Hekayə Yuqoslaviyanın dağılmasından sonra, müharibədən az əvvəl Herseqovinada baş verir. Almaniyada iyirmi il çəkən sürgündən qayıdan Divko Buntić gənc sevgilisi, yepyeni Mercedes, bol pulu və uğur gətirdiyinə inandığı qara pişiyi ilə kəndinə gəlir. Pişik itəndə işlər qarışır; sevgilisi ilə problemlər yaranır, ondan ayrılmış oğlu ilə münasibəti gərginləşir və bütün qəsəbə pişiyi tapana veriləcək mükafatın dalınca düşür. Müharibə yaxınlaşarkən Divko təzəcə təmir olunmuş evində qalıb-qalmamağa qərar verməlidir. Baş rollarda Miki Manojlović (Divko), Mira Furlan, Boris Ler və Jelena Stupljanin yer alır.