La Cité de l'indicible peur

La Cité de l'indicible peur është një komedi krimi franceze e vitit 1964 e regjizuar nga Jean-Pierre Mocky, e cila gjithashtu përmban elemente horrori. Filmi është adaptuar nga romani me të njëjtin titull i shkrimtarit belg Jean Ray, i botuar në 1943; Mocky e zhvendosi subjektin origjinal, që zhvillohet në Skoci, në një qytezë të trilluar të Francës. Fotografinë në bardhë e zi e kreu Eugen Schüfftan, dhe xhirimet u realizuan në qytezën e vogël mesjetare Salers. Rolet kryesore i luajnë Bourvil, Francis Blanche, Jean Poiret dhe Jean-Louis Barrault.

Gjatë shfaqjes së parë, filmi u shkurtua nga shpërndarësi dhe u prezantua me titullin La Grande Frousse; arriti një sukses të moderuar në arkë me rreth 680.000 shikues. Në 1972, Mocky e riktheu në shfaqje versionin e plotë të filmit me titullin që preferonte dhe që është i njëjtë me atë të romanit, La Cité de l'indicible peur.