Ndërtimi i anijeve nga lëkurat e shalqirit (Karpuz Kabuğundan Gemiler Yapmak) (përkthyer)

Karpuz Kabuğundan Gemiler Yapmak është një dramë turke e vitit 2004, e shkruar dhe e regjisuar nga Ahmet Uluçay, filmi i tij i parë kinematografik. Emrin e merr nga një shprehje që do të thotë “të mundohesh kot për punë që s’bëhen” dhe që thuhet edhe “nëse hip në anije nga lëvorja e shalqirit, do të zbresësh shpejt”. Filmi kishte përfunduar në vitin 2001, por u takua me shikuesit vetëm tre vjet më vonë, më 26 nëntor 2004. Në prodhimin ku nuk marrin pjesë aktorë të njohur, regjisori luan vetë në rolin e berberit. Filmi, që paraqet copëza nga jeta e Uluçayt, rrëfehet me një gjuhë të natyrshme, të realizmit poetik dhe mori shumë çmime.

Në vitet 1960, në një fshat të vogël anadollak të quajtur Tepecik, Recepi dhe Mehmeti janë dy fëmijë fshati që verës bëjnë shegertllëk në qytezën aty pranë, Tavşanlı: Recepi punon te një shitës shalqinjsh, Mehmeti te një berber. Të dy janë çmendurisht të dashuruar pas kinemasë. Natën përpiqen të ndërtojnë një projektor filmi të improvizuar në një stallë të braktisur në fshat dhe ëndërrojnë të bëhen regjisorë. Mbështetësi i vetëm i përpjekjeve të tyre është i çmenduri i fshatit, Ömeri. Kur Recepi njihet me Nezihen, që vjen të mbledhë shalqinjtë e prishur, dhe i jep zemrën, vera shndërrohet në një stinë që të dy nuk do ta harrojnë. Luajnë İsmail Hakkı Taslak (Recepi), Kadir Kaymaz (Mehmeti), Gülayşe Erkoç (Nezihe), Boncuk Yılmaz (Nihal) dhe Fizuli Caferof.

Drejtori i fotografisë është İlker Berke; muzikën e kanë bërë Ender Akay dhe Alper Tunga Demirel. Ndër producentët janë Serdar Tahiroğlu, Diloy Gülün dhe Serkan Çakarer; e shpërndau UIP. Uluçay kishte xhiruar më parë një film të shkurtër me emër të ngjashëm, Koltuk Değneklerinden Kanat Yapmak.