Truri (Le Cerveau) (përkthyer)

The Brain (me titullin origjinal Le Cerveau) është një komedi grabitjeje franko-italiane e vitit 1969, e drejtuar nga Gérard Oury. Filmi frymëzohet nga grabitja e famshme e trenit postar në Angli në vitin 1963 dhe ndërton një histori fiktive vazhdimi. Prodhimi u bë i mundur falë suksesit të madh të mëparshëm të Oury, La Grande Vadrouille, dhe mblodhi buxhetin më të lartë të kinemasë franceze të kohës. Në Francë tërhoqi më shumë se pesë milionë shikues, por prapëseprapë i zhgënjeu producentët, sepse nuk arriti shifrat e paraardhësve.

Kur selia e NATO-s zhvendoset nga Parisi në Bruksel, paratë e aleancës duhet të transportohen me tren, dhe ky transferim tërheq vëmendjen e disa grupeve vjedhësish që nuk dinë për njëri-tjetrin. Jean-Paul Belmondo dhe Bourvil luajnë dy mashtrues të vegjël francezë. David Niven është oficeri anglez që fsheh identitetin, pra gjeniu i krimit me nofkën "Truri"; Eli Wallach luan një krye mafioz siçilian. Të gjithë garojnë për të marrë të njëjtat para. Në kast janë edhe Silvia Monti, Dominique Zardi dhe Henri Attal.

Xhirimet u vonuan për shkak të ngjarjeve të majit 1968 dhe u bënë, përveç Francës, në Angli, Amerikë dhe Itali. Transatlantiku France në Le Havre dhe kopja 13,5 metërshe e Statujës së Lirisë e vulosin filmin. Muzikën e ka bërë Georges Delerue; producentë janë Gaumont, shoqëria e Dino De Laurentiis dhe Paramount Pictures.