Qyteti Vrasës (Öldüren Şehir) (përkthyer)

Öldüren Şehir (me titullin anglisht Murderous City) është një dramë turke bardhezi e drejtuar nga Ömer Lütfi Akad në vitin 1953. Prodhimin e ka ndërmarrë Kemal Film; prodhues janë Osman F. Seden dhe Şakir Seden. Filmi niset nga vepra e Orhan Hançerlioğlu-t. E bashkon në rolet kryesore Ayhan Işık me Belgin Doruk.

Historia nis në një lagje të varfër të Gjirit të Artë, kalon nëpër rrugët e Beyoğlu-t dhe përfundon në një lagje periferike. Babai i Selma-s, tetëmbëdhjetë vjeçe (Belgin Doruk), është një kapiten i ndershëm por i dhënë pas pijes, ndërsa nëna një grua llafazane e lagjes. I fejuari i saj, Ali (Ayhan Işık), është kryepunëtor në një punishte. Kur Ali arrestohet sepse ka qëlluar dikë në kafenenë e lagjes, Selma tërhiqet në botën me shkëlqim të Beyoğlu-t; shpërngulet te një shoqe që punon në një klub nate dhe vetë gjen punë aty. Interesimi i pronarit të klubit, Şevket (Turan Seyfioğlu), ngjall xhelozinë e shoqes. Ali, pasi e mbaron dënimin, del dhe e nxjerr Selma-n nga ky ambient, dhe të dy kthehen në lagjen e tyre. Në kast janë edhe Nubar Terziyan (Osman), Kenan Pars (Kenan), Settar Körmükçü, Şevki Artun dhe Muazzez Arçay.

Skenarin e kanë shkruar së bashku Osman F. Seden dhe Akad. Drejtimin e fotografisë e ka ndërmarrë Kriton İlyadis, montazhin Turgut Kuzu, drejtimin artistik Sami Pandır.