Strehë (Freistatt) (përkthyer)

Marc Brummund e drejtoi dramën gjermane Freistatt në vitin 2015; skenarin e shkroi së bashku me Nicole Armbruster. Filmi, përmes një historie personale, trajton metodat poshtëruese dhe të dhunshme që zbatoheshin në konviktet edukative të lidhura me kishën në fund të viteve 1960. Rrëfimi bazohet në dëshminë e një ish-banori të konviktit që kishte qëndruar në një institucion diakonik. Xhirimet u bënë përreth qendrës diakonike Freistatt, ku ndodhën ngjarjet; fondacionet von Bodelschwingh në Bethel, që e drejtonin institucionin në vitin 1968, i mbështetën xhirimet si pjesë e përballjes me të kaluarën.

Historia zhvillohet në verën e vitit 1968. Wolfgang-u katërmbëdhjetëvjeçar, pas një konflikti me njerkun, dërgohet nga zyra e rinisë në institucionin edukativ të krishterë në Freistatt. Aty mbretëron një rend ushtarak: punonjësit quhen "vëlla", fëmijët detyrohen të bëjnë punë të rënda në kënetën e torfës, kur dikush shkel rregullin dënohet gjithë grupi. Wolfgang-u refuzon t'i nënshtrohet babait të shtëpisë, Brockmann; çmimin e përpjekjeve për t'u arratisur e paguan me të rrahura dhe me uri. Wolfgang-un e luan Louis Hofmann; në ekip janë edhe Katharina Lorenz, Uwe Bohm, Alexander Held, Stephan Grossmann dhe Max Riemelt.

Filmi e bëri premierën botërore në festivalin Max Ophüls Preis dhe aty mori çmimin e publikut dhe çmimin e jurisë së të rinjve. Doli në kinema më 25 qershor 2015. Në zgjedhjen e kandidatit të Gjermanisë për filmin më të mirë në gjuhë të huaj në Çmimet e 88-ta të Akademisë, ai hyri në listën e shkurtër me tetë filma; zgjedhja shkoi te Labyrinth of Lies.