Tre Majmunë (Üç Maymun) (përkthyer)

Üç Maymun, filmi i vitit 2008 i Nuri Bilge Ceylanit, është një dramë, bashkëprodhim i Turqisë, Francës dhe Italisë. Në skenar Ceylanin e shoqëruan bashkëshortja e tij Ebru Ceylan dhe aktori Ercan Kesal. Filmi, që e merr emrin nga motivi i tre majmunëve që nuk e shohin, nuk e dëgjojnë dhe nuk e thonë të keqen, rrëfen përpjekjen e një familjeje, të copëtuar nga kthimi i dobësive të vogla në gënjeshtra të mëdha, për të mbetur bashkë duke mbuluar të vërtetën.

Në rrëfim, shoferi Eyüp hyn në burg pasi merr përsipër, kundrejt parave, përgjegjësinë e një aksidenti rrugor me vdekje të shkaktuar nga biznesmeni Servet, që do të kandidojë nga partia e opozitës. Ndërkohë lidhja që nis mes Servetit dhe gruas së Eyüpit, Hacer, si dhe zemërimi i djalit İsmail e tërheqin familjen brenda një krimi të ri. Rolet kryesore i ndajnë Yavuz Bingöl, Hatice Aslan, Ahmet Rıfat Şungar dhe Ercan Kesal. Filmi i solli Ceylanit Çmimin për Regjisorin më të Mirë në Festivalin e Filmit të Kanës 2008 dhe, si kandidat i Turqisë në Çmimet e 81-ta të Akademisë, mbeti ndër nëntë filmat e fundit.