Turqisht për fillestarë (Türkisch für Anfänger) (përkthyer)

Türkisch für Anfänger (në turqisht: Yeni Başlayanlar İçin Türkçe) është një film komedi gjerman i vitit 2012, i shkruar dhe i drejtuar nga Bora Dağtekin. Prodhimi, që e kthen përplasjen ndërkulturore në komedi, është përshtatja kinematografike e serialit ARD me të njëjtin emër, të krijuar nga vetë Dağtekin, dhe është përpjekja e parë e regjisorit në drejtimin e filmave. Filmi e tregon historinë e serialit nga e para. Prodhimi, që zgjat rreth 105 minuta, është realizuar nga Rat Pack Filmproduktion së bashku me Constantin Film, ARD Degeto, BR, WDR, NDR, Panda Plus dhe Bluverde Filmproduktion.

Historia fillon kur avioni i familjeve Schneider dhe Öztürk, që kanë dalë për pushime në Tajlandë, bën ulje emergjente në një ishull të shkretë. Anëtarët e dy familjeve shumë të ndryshme detyrohen ta njohin njëri-tjetrin. Lena, që dëshiron të largohet pak nga jeta e saj e pakënaqur, jeton aventura të çuditshme me një maço turk që e njeh në avion. Lena Schneider-in e luan Josefine Preuß, Cem Öztürk-un Elyas M'Barek, Yağmur Öztürk-un Pegah Ferydoni, Metin Öztürk-un Adnan Maral; në kast janë edhe Katja Riemann, Anna Stieblich dhe Arnel Taci.

Të gjithë aktorët e serialit, përveç Emil Reinke-s, kanë marrë pjesë edhe në film. Filmi pati premierën më 6 mars 2012 në Mynih dhe hyri në kinematë gjermane më 15 mars 2012. Në Rusi doli në kinema më 26 shtator 2013, me kufizim moshe 16 vjeç.