Mjaltë (Bal) (përkthyer)

Bal është një dramë turke 104-minutëshe, që e ka drejtuar Semih Kaplanoğlu; bashkëprodhim i Turqisë, Gjermanisë dhe Francës. Filmi është hallka e fundit e "Trilogjisë Yusuf", që e ndjek jetën e poetit Yusuf së prapthi; dy filmat e parë ishin Yumurta (2007) dhe Süt (2008). Prodhimi, i shfaqur më 16 shkurt 2010 në konkurrimin e Festivalit të 60-të të Filmit të Berlinit, fitoi Ariun e Artë dhe u bë filmi i tretë turk që e merr këtë çmim; dy të mëparshmit ishin Susuz Yaz (1964) dhe Duvara Karşı (2004). Në Turqi hyri në shfaqje më 9 prill 2010.

Historia vë në qendër Yusufin e vogël, që sapo ka nisur shkollën, dhe babanë e tij, që e siguron jetesën me bletari në një pyll të zymtë. Yumurta tregonte Yusufin e rritur, Süt marrëdhënien me nënën, ndërsa Bal zbret te fëmijëria e poetit; këtë herë vendin e nënës e zë babai. Yusufi i tregon babait një ëndërr që ka parë një natë, por përmbajtja mbetet sekret. Kur babai shkon në thellësi të pyllit dhe nuk kthehet, fëmija mbyllet në vete dhe futet në pyll për ta kërkuar. Në role janë Bora Altaş, Erdal Beşikçioğlu dhe Tülin Özen.

Skenarin Kaplanoğlu e shkroi së bashku me Orçun Köksal; xhirimet u bënë në rrethin Çamlıhemşin të Rizes, në rrëzë të maleve Kaçkar. Filmi u zgjodh kandidati i Turqisë në Çmimet e 83-ta të Akademisë, por nuk arriti në listën përfundimtare.